Romani “Gjenerali i ushtrisë së vdekur” edhe në gjuhën rome

Kryevepra e shkrimtarit më të madh shqiptar, Ismail Kadare, romani “Gjenerali i ushtrisë së vdekur” mund të lexohet në gjuhën e tyre edhe nga qytetarët e komunitetit rom me titull “Mula armadako generalo”. Kjo kryevepër e Kadaresë, e përkthyer rrjedhshëm nga gjuhëtari Ibrahim Elshani, është promovuar sot në Bibliotekën Kombëtare dhe Universitare të Kosovës në Prishtinë. Elshani, i cili dallohet për përkthimin e disa veprave të tjera nga gjuha shqipe në gjuhën rome, ka thënë se përkthimi i kësaj të fundit ishte i vështirë për faktin se gjuha rome është e varfër nga leksiku. Romani “Gjenerali i ushtrisë së vdekur” e ngrit Kadarenë në rangun e krijuesve më të mëdhenj të botës. Ky roman është botuar në dhjetëra gjuhë të huaja, ndërsa në Francë është realizuar edhe një film sipas një skenari të kësaj vepre.